Laurel, Batangas – Sa ginanap na NIA-IA Congress 2025 noong Abril 1-4, 2025 sa Canyon Woods Resort Hotel, Laurel, Batangas, pinangunahan ni Engr. Eduardo “Eddie” G. Guillen, NIA Administrator, ang talakayan tungkol sa mga makabuluhang programa ng National Irrigation Administration (NIA). Isa sa mga tampok na panauhin ay si Senador Imee Marcos, na nagbigay ng mahalagang pananaw sa hinaharap ng agrikultura at irigasyon sa bansa. Samantala, nagbigay rin ng panayam si Administrator Guillen upang ipaliwanag ang mga inisyatiba ng NIA sa pagtulong sa mga magsasakang apektado ng tagtuyot.
Ayon kay Administrator Guillen, isa sa mga pangunahing dahilan ng mababang ani ng mga magsasaka ay ang maling pagsunod sa tracking calendar ng pagtatanim. Ipinaliwanag niya na hindi dapat iwasan ang pagtatanim sa tag-init dahil dito mas napapahusay ang proseso ng photosynthesis na nagpapataas ng ani kumpara sa tag-ulan. Binigyang-diin niya na isa sa mga hakbang ng NIA ay ang pagsasaayos ng tamang iskedyul ng pagtatanim upang mapakinabangan ng mga magsasaka ang mas mataas na ani sa panahon ng tag-araw.
Bukod sa tamang calendar tracking, inilunsad din ng NIA ang paggamit ng artificial intelligence (AI) sa weather forecasting upang mapabuti ang pagtukoy sa tamang panahon ng pagtatanim. Ayon kay Guillen, mas mataas ang accuracy ng AI weather forecast kumpara sa tradisyunal na sistema ng PAG-ASA, na umaabot ng 98% ang prediksyon ng tamang lagay ng panahon. Sa pamamagitan ng makabagong teknolohiyang ito, mas napapanahon at eksaktong matutukoy kung aling mga rehiyon ang makararanas ng pag-ulan sa loob ng 30 araw, na lubos na makakatulong sa pagpaplano ng pagtatanim.
Sa kabuuan, ang NIA-IA Congress 2025 ay nagsilbing mahalagang plataporma upang mapag-usapan ang epektibong mga hakbang sa pagpapabuti ng irigasyon at agrikultura sa bansa. Sa pamamagitan ng tamang pagtatanim at paggamit ng makabagong teknolohiya tulad ng AI weather forecasting, mas matutulungan ang mga magsasaka na mapaunlad ang kanilang ani at maiwasan ang matinding epekto ng tagtuyot.