Sa press conference ng Alyansang Makabagong Pilipino, ipinahayag ni Benhur Abalos ang ilang mahahalagang hakbang sa kanyang plataporma na layong magbigay ng ginhawa sa mga ordinaryong mamamayan, lalo na sa mga manggagawang walang benepisyo. Isa sa mga pangunahing suhestiyon ni Abalos ay ang pagtanggal ng Value Added Tax (VAT) sa mga singil sa kuryente. Ayon sa kanya, malaking tulong ang hakbang na ito upang mabenefisyo ang mga pamilyang Pilipino sa gitna ng patuloy na pagtaas ng presyo ng mga bilihin. Tiniyak ni Abalos na ang pagtanggal ng VAT sa kuryente ay magdudulot ng agarang pagaan sa mga gastusin ng bawat pamilya, kaya’t ito ay isang hakbang na itutulak niya kapag siya ay makaupo sa Senado.
Sa kanyang pahayag, binigyang-diin ni Abalos na ang mataas na singil sa kuryente ay isang malaking pasanin sa mga pook, kaya’t naniniwala siya na hindi ito dapat gawing dahilan ng gobyerno upang kumita ng buwis. “Dapat hindi pabigat sa mga pamilya ang mga singil sa kuryente, lalo na sa mga panahong mataas ang inflation at mahal na ang bilihin,” ayon kay Abalos. Naniniwala siya na ang pagtanggal ng VAT ay isang hakbang patungo sa mas makatarungang sistema ng pagbubuwis at makakatulong sa mga pamilyang Pilipino na magkaroon ng higit na kakayahan sa pang-araw-araw nilang buhay.
Hindi lamang ang mga konsyumer ang binigyang pansin ni Abalos, kundi pati na rin ang kalagayan ng mga manggagawang job order at contractual na madalas ay hindi nakakakuha ng mga benepisyo. Ibinahagi ni Abalos na ang mga empleyadong ito, kahit pa nagtatrabaho sa gobyerno, ay hindi tinatamasa ang mga pribilehiyo ng regular na empleyado. “Ang mga empleyado natin, apat yan—regular, job order, casual, at contractual. Yung mga job order at contractual, walang benepisyo. Hanggang ngayon, hindi sila tinutulungan,” ani Abalos. Kaya’t ipinaglalaban niya na magkaroon sila ng mga insentibo at benepisyo tulad ng mga regular na empleyado.
Ayon pa kay Abalos, ang mga job order at contractual na manggagawa ay may malaking papel sa pagpapatakbo ng gobyerno ngunit nananatili silang hindi nakikinabang sa mga benepisyo na dapat sana ay natatamasa nila. Isinusulong ni Abalos ang mga reporma na magbibigay ng mga insentibo at benepisyo sa mga manggagawang ito, partikular na ang pagkakaroon ng mga incentive pay at iba pang mga benepisyo na magbibigay ng tamang pagkilala sa kanilang trabaho. Sa panghuling bahagi ng kanyang pahayag, iginiit ni Benhur Abalos na ang kanyang plataporma ay nakatuon sa pagtugon sa mga pangangailangan ng bawat Pilipino, lalo na ang mga manggagawa at konsyumer. Ang kanyang mga hakbang upang tanggalin ang VAT sa kuryente at magbigay ng benepisyo sa mga manggagawang job order ay layuning mapabuti ang kalagayan ng mga pook at magsilbing solusyon sa mga isyu ng hindi pagkakapantay-pantay sa mga empleyado ng gobyerno. Ang kanyang mga reporma ay isang pagsusumikap upang matugunan ang pangangailangan ng taumbayan at makapagbigay ng konkretong pagbabago sa kanilang buhay.